వాలంటీర్లకు ₹10 వేల హామీ ఏమైంది? సోషల్ మీడియా ఇన్‌ఫ్లుయెన్సర్లకు మాత్రం పారితోషికాలా? – బాధ శ్రీనివాస్
విశాఖపట్నం, సెప్టెంబర్ 29: వాలంటీర్లకు నెలకు ₹10,000 గౌరవ వేతనం ఇస్తామని ఎన్నికల సమయంలో ఇచ్చిన హామీని ప్రభుత్వం అమలు చేయకుండా, తాజాగా సోషల్ మీడియా ఇన్‌ఫ్లుయెన్సర్లకు ఫాలోవర్ల ఆధారంగా పారితోషికాలు చెల్లించే విధానానికి కేబినెట్ ఆమోదం తెలపడంపై ప్రభుత్వం సమాధానం చెప్పాలని వైఎస్సార్ కాంగ్రెస్ పార్టీ విశాఖ ఉత్తర నియోజకవర్గం వాలంటీర్స్ వింగ్ అధ్యక్షులు బాధ శ్రీనివాస్ డిమాండ్ చేశారు
బాధ శ్రీనివాస్ మాట్లాడుతూ—
“వాలంటీర్లకు నెలకు ₹10 వేల గౌరవ వేతనం ఇస్తామని హామీ ఇచ్చారు. ఆ హామీ ఏమైంది? వాలంటీర్ల భవిష్యత్తుపై ప్రభుత్వం ఎందుకు స్పష్టత ఇవ్వడం లేదు?” అని ప్రశ్నించారు.
“ప్రజలకు ఇంటింటికీ వెళ్లి ప్రభుత్వ సేవలు అందించిన వాలంటీర్లకు ఇచ్చిన హామీ అమలుపై ప్రభుత్వం మౌనం వహిస్తుండగా, సోషల్ మీడియా ద్వారా ప్రభుత్వ కార్యక్రమాలు, సంక్షేమ పథకాలను ప్రచారం చేసేందుకు ఇన్‌ఫ్లుయెన్సర్లను ఎంప్యానెల్ చేసే విధానానికి కేబినెట్ ఆమోదం తెలిపింది. ఫాలోవర్ల సంఖ్య ఆధారంగా ₹2,500 నుంచి గరిష్ఠంగా ₹15,000 వరకు చెల్లించే విధానం గురించి ప్రభుత్వం ప్రకటించింది.”
“సోషల్ మీడియా ప్రచారానికి నిధులు కేటాయించే ముందు, ప్రజల కోసం క్షేత్రస్థాయిలో పనిచేసిన వాలంటీర్లకు ఇచ్చిన ₹10 వేల హామీని ఎందుకు అమలు చేయడం లేదు?” అని ఆయన నిలదీశారు.
“సోషల్ మీడియా ఇన్‌ఫ్లుయెన్సర్లకు పారితోషికం ఇవ్వడం ప్రభుత్వ విధాన నిర్ణయం కావచ్చు. అయితే అదే సమయంలో వాలంటీర్లకు ఇచ్చిన హామీపై కూడా ప్రభుత్వం తన వైఖరిని స్పష్టంగా చెప్పాలి. ఎంతమంది వాలంటీర్లకు, ఎప్పటి నుంచి, ఏ విధానంలో ₹10 వేల గౌరవ వేతనం ఇస్తారో అధికారికంగా ప్రకటించాలి.”
“కరోనా సమయంలో ప్రాణాలను సైతం లెక్కచేయకుండా ప్రజలకు సేవలు అందించిన వాలంటీర్ల సేవలను ప్రభుత్వం గుర్తించాలని కోరుతున్నాం. వారి భవిష్యత్తుపై అనిశ్చితి లేకుండా స్పష్టమైన నిర్ణయం తీసుకోవాలి.”
“వాలంటీర్లకు హామీ ఒకటి… సోషల్ మీడియా ప్రచారానికి విధానం మరొకటి ఎందుకు?”
“ప్రభుత్వం వాలంటీర్లకు ఇచ్చిన ₹10 వేల హామీపై తక్షణమే స్పష్టత ఇవ్వాలి. వాలంటీర్ల ప్రశ్నలకు సమాధానం చెప్పాల్సిన బాధ్యత ప్రభుత్వంపై ఉంది.” అని బాధ శ్రీనివాస్ డిమాండ్ చేశారు.
